قصة كفاح .. و نجاح

كتبهامى المنوفيه ، في 19 يونيو 2008 الساعة: 13:19 م

كنت قد تلقيت دعوه لحضور مؤتمر بمناسبة يوم المرأه المصريه … الحقيقه أنا بطبيعتى مش بحب احضر المؤتمرات النسائيه ، قد تكون عقده داخليه ، لأنى بحس إن الستات مالهمش ف مؤتمرات و لا كلام منده ، أو باتخيل أى مؤتمر نسائى بيبدأوه بالزغاريت بس التصفيق ، و الرغى أثناء تحدث الضيوف ، لكن جوايا حاجه غريبه خلتنى أتمسك إنى لازم أروح ، لعل هذه الحاجه كانت مشروع التخرج ، لعل و عسى أخرج بماده صالحه للنشر …

لم يلفت نظرى فى الحضور سوى شخصيه بسيطة جداً ، سواء كان فى طريقة كلامها ، أو فى حركاتها ، و إسلوبها ….

والشخصيه دى هى محور قصة النهارده …

الإسم : جيهان إبراهيم عبد العظيم ..
إسم الشركه : 3E KIT
الموقع : قويسنا
*****
تكلمت عن الشركه بتاعتها …
و بدأت بالفكره ، إنها فى الأساس كانت ملاحظه إن كل المعامل إللى كانت عندهم فى الكليه كانت صناعه أجنبيه [ حته م الصين على حته م اليابان على حته من الهند و فى الآخر إتركبت فى مصر ] طبعاً مفيش حاجه زى كده بتتصنع فى مصر إطلاقاً ، فقررت إنها تكون أول شركه مصريه و عربيه لأجهزة الكمبيوتر و الألعاب الإليكترونيه ، و المعامل المدرسيه و الأجهزه الطبيه و حاجات تانيه كتيييييييير …
طبعاً إحنا ما سكتناش عن حاجه زى دى ، و أخدنا منها كارت و رحنا زرنا المصنع فى قويسنا …

*******************

وصلنا قويسنا حوالى الساعه 12 صباحاً ، و قعدنا ييجى ساعه ندور ع المصنع ف عز النار و الولعه و كنا حرانين جداً و عطشانين جداً جداً جداً … و بعد ساعه من اللف و الدوران وقفنا قدام الشركه و بنسأل واحد من العاملين فيها هيا فين الشركه ؟ ..
دخلنا عليها فى المكتب ، بشوشه جداً ، و رحبت بينا أوى ، أهم حاجه إنها جابت لنا حاجه ساقعه و إحنا كنا ميتين م العطش ، شربت كوبايتى و كوباية بنتها كنت ميته م العطش أعمل إيه يعنى ؟ ؟ ..
******
بدأت بإعادة شرح من أين جاءت الفكره ؟ … و طبعاً دى قلتها قبل كده .. لكن إللى نسيت أقوله إن الرحله بدأ عام 1999
كلمتنا عن التضحيات إللى عملتها علشان كانت متمسكه بهدفها ، و إنها باعت شبكتها و أجزاء كتير من أثاث بيتها و بعض الأدوات الكهربائيه علشان تعمل الشركه و تجهز المصنع و تشترى المعدات .
الشركه فى البدايه بدأت بإنتاج صناعتين هما المعامل المدرسيه ، و ألعاب الإليكترونيات ، دلوقتى الشركه بتنتج 80 منتج ، لكن المعامل و ألعاب الإليكترونيات هى الصناعتين الأساسيتين لحد دلوقتى ..
الشركه هى أول شركه عربيه نتنج التليفزيون التعليمى و كانت أول كليه إستفادت منه فى الوطن العربى هى هندسة إليكترونيات فى منوف ، و قالت إن الشركه بتصنع أجهزة رسم قلب و أجهزه طبيه أخرى ..
جهزت معامل مدرسيه فى مصر و السعوديه و الكويت ..
و على فكره ، كل الصناعات مكوناتها الداخليه و الخارجيه بتتصنع فى المصنع بتاعها ، يعنى كلها Made in Egypt !! لأ مش إيجبت بس دى Made in Menoufia Kingdum ، و دخلنا معرض الشركه ، فيه كل حاجه بتنتجها الشركه .. أكتر حاجه عجبتنى ألعاب الأطفال الإليكترونيه ، لأنها ظريفه جداً فى تعليم الطفل تركيب الأسلاك فى سوست ورا بعض و مرسوم على اللعبه مثلاً صورة سفينه ، و أول ما الطفل يركب الأسلاك فى السوست يسمع صوت سفينه ، و هكذا بقية الألعاب الأخرى …
سألناها إذا كانت تعرضت لصعوبات سواء كانت ماديه أو غير ماديه ..
قالت طبعاً الحكومه تدعيمها للصناعات إللى زى دى زى قلته ، يعنى غير كافى إطلاقاً إنها تبدأ فى مشروع ضخم زى دا ، و علشان كده إضطرت إنها تبيع حاجات كتير تملكها علشان تكمل مشروعها ..
الصعوبات التانيه إللى هيا المعنويه ، إن الحكومه مش مهتمه بيهم أصلاً و لا حتى بتسمح لها بالإشتراك فى المعارض لأنها غاليه جداً رغم إنها فى الأول كانت ببلاش ..
و بتقول إنها زى ما اتعرضت لصعوبات إتعرضت لإغراءات ..

زى مثلاً إن فى دول كتير عرضت عليها إنها تسافر بمشروعها لهذه الدول ، بعروض خياليه جداً ، لكنها قالت كلمه عجبتنى أوى أحب اختم بيها اللقاء ..
” أنا لو هاقعد فى مصر أنحت فى الصخر و أنفعها ، أحسن ما أقعد فى دوله تانيه و أعيش عيشه مرفهه ، أنا مش عايزه مصر تبقا خرابه ، كل الكفاءات سابت مصر ، يا جماعه الإصلاح مش هييجى فجأه و لا بدون تعب ، لازم هنتعب و هندوق المر علشان الأجيال الجايه تقدر تعيش ، أهم حاجه عندى صنع فى مصر ، وباحلم إن منتجات مصر توصل للعالم كله و نصدر للعالم كله حاجاتنا زى زمان ” …

لزيارة موقع الشركه ..

تفضلوا بالضغط هنا

أضف الى مفضلتك