إعلامنا الغبى عندما يتذاكى

كتبهامى المنوفيه ، في 17 يونيو 2008 الساعة: 12:47 م

ما شاء الله …
لا قوة إلا بالله …
إعلامنا من كتر ذكاؤه حاسه إنى هاحسده .. …
طبعاً سمعتم عن حادثة الزيتون إللى حصل فيها سطو مسلح على محل أحد تجار الدهب …
عادى …
طب و إيه المشكله ؟
البلد أصلاً فيها كل حاجه بتحصل غريبه الأيام دى … يعنى هوا حد كان سمع قبل كده عن نسبة الإنتحار العاليه ؟
حد كان بيسمع عن حوادث قتل الإبن لأبوه و الأب لأولاده ؟
حد كان بيسمع عن الحوادث اللا أخلاقيه إللى كانت بتحصل زى الأيام دى ؟
طبعاً لأ ….
طب نيجى بقا لكيفية تناول وسائل إعلامنا الذكى للحادث …
و هى تتخلص فى أنهم ركزوا أكتر من مره على إن ممكن يكون الحادث طائفى … يعنى هيا البلد كانت ناقصه دى كمان ….
كمان جلسة مجلس الشعب بتاعة النهارده ، الأذكياء لم يحذفوا فى المونتاج الجزء الخاص بهذه الحادثه …
لو كان حصل نوع من أنواع التعتيم على هذه النقطه فى الحادث ، لا أعتقد إنه كان من الممكن إثارة النعره الطائفيه من جديد فى الأوساط الشعبيه إللى بدأت تعود بفعل وسائل الإعلام الذكيه إلى أقصى حد ..
أفتكر مره كنت باقرأ المصرى اليوم ، لقيته ف الصفحه الأولى كاتبلى ” قس يصدم طفله مسلمه بسيارته فى شارع مش عارفه إيه ؟؟ …!!” …
يعنى هوا كان عايز يقول مسلمه ؟؟ ….
ما الناس كلها بتعمل حوادث ..
معنى كده إن كل حادثه بتتعمل بتكون مستهدفه الشخص الضحيه ؟ …
و يا ما حوادث طرق بتحصل بين مسلمين و مسلمين و مسيحيين و مسيحيين … يعنى حوادث معروفه …
طب إشمعنى دى إللى أظهرتوها أوى كده ؟ …
و يا ما إعلامنا الذكى جداً بيعتم على أخبار … يعنى هييجوا ع المهم و يقولوا الحياديه و المصداقيه ….
ما شاء الله …
إعلام ذكى فعلاً ..
حياديه و موضوعيه و نزاهه .. مفيش بعد كده …